Снимањето на долгометражниот игран филм „Трампи“ по сценарио и во режија на Ѓорче Ставрески почна на 25 септември во продукција на „Фрагмент Филм“. Филмот ќе се снима на повеќе локации во Скопје во наредните месеци, во период од 38 дена.

Станува збор за втор долгометражен игран филм на Ставрески, кој по големиот успех на „Исцелител“, снима нова, сосема поинаква, но подеднакво интересна приказна.

Главните улоги во филмот ги играат Сергеј Димовски и Стефанија Начевска. Во останатите улоги се Александар Микиќ, Игор Ангелов, Петар Мирчевски, Душица Настова, Наум Ѓоргиевски, Ана Димитрова, Григор Јовановски и многу други. Кастинг-директор е Билјана Драгиќевиќ Пројковска.

Директор на фотографија на „Трампи“ е Дејан Димески, сценограф е Симо Бранов, костимограф е Жаклина Крстевска, на шминка и маска работи Јасмина Лилиќ од Србија, дизајнер на звук е Лука Шуто од Чешка Република.

Продуценти на филмот се Ивана Шекуткоска и Ѓорче Ставрески, копродуцент е Алзбета Јаначкова. Филмот е поддржан од Агенцијата за филм на РС Македонија и Чешкиот филмски фонд.