По повод чествувањето на 90 години од раѓањето на писателот и поет Петре М. Андреевски во неговото родно село и крај вечното почивалиште во с. Слоештица, Демир Хисар, ќе се одржи настан на денот на неговото раѓање.

Настанот ќе се одржи на 25 јуни, во 13 часот, и е во организација на Македонското научно друштво – Битола, во соработка со Педагошкиот факултет – Битола, Универзитетот „Св. Климент Охридски“ – Битола, Студенското собрание при УКЛО, „Арт поинт – гумно“, с. Слоештица и „Јуроп хаус Битола“.

Покрај посета и оддавање почит на гробот на Петре во с. Слоештица, предвидена е реализација на културна манифестација која вклучува литературно читање на дел од поезијата на Петре М. Андреевски и квиз со едукативен карактер, поврзан со ликот и делото на Петре М. Андреевски. Литературното читање и квизот ги подготвија студенти од Педагошки факултет – Битола, и истите ќе се реализираат во реновираниот Задружен дом во с. Слоештица.

Настанот ќе заврши во „Арт поинт – гумно“ со свечено откривање на скулптура, инспирирана од прочуената песна „Дениција“ на Андреевски, а изработена од познатиот македонски уметник Никола Пијанманов.

Свое присуство и обраќање на настанот најавил и Амбасадорот Дејвид Гир од Делегацијата на ЕУ во Скопје.