ВИДЕОИНТЕРВЈУ | Милан Стефановски, политиколог: Еуфорично презентирање на инвестиции во стилот на Никола Груевски
![](https://www.slobodenpecat.mk/wp-content/uploads/2024/06/DSC_1767-scaled.jpg)
ВМРО-ДПМНЕ е една конгломерат партија и таа е многу силна во стилот на презентирањето на проектите, тој стил го негуваше и Никола Груевски кога беше лидер на ВМРО-ДПМНЕ и тој континуитет не е лошо да се запази иако Христијан Мицкоски има различен стил, но еуфоричноста во настапот на презентирањето на проектите е тој стил препознатлив и тој дава разултати, вели Милан Стефановски во интервјуто за утринската програма на Слободен печат
Граѓаните од новата Влада бараат инвестиции, нови работни места и повисоки плати, а премиерот Христијан Мицкоски првата голема инвестиција во секторот на енергетиката ја најави мошне помпезно уште и пред да седне во премиерската фотелја. Политикологот Милан Стефановски, кој беше гостин во утринската програма на Слободен печат, посочи дека еуфоричноста во најавувањето на економските проекти е добро утврдена практика на ВМРО-ДПМНЕ и не се разликува многу од стилот што го негуваше Никола Груевски.
– ВМРО-ДПМНЕ е една конгломерат партија и таа е многу силна во стилот на презентирањето на проектите, но за да граѓаните го очекуваат од вас тоа што вие ќе го испорачате е многу важно да имате отчет што сте сработиле претходно, со какви кадри располагате и стилот да го запазите во однос на чесноста, односно тоа што сте го ветиле да го остварите. Тој стил го негуваше и Никола Груевски кога беше лидер на ВМРО-ДПМНЕ и тој континуитет не е лошо да се запази иако Христијан Мицкоски има различен стил, но еуфоричноста во настапот на презентирањето на проектите е тој стил препознатлив и тој дава разултати – вели Стефановски.
Што се однесува до проблемите што настанаа на меѓународен план, откако претставниците на новата власт одбиваа или неволно го употребуваа уставното име на државата, Стефановски потенцира дека ВМРО-ДПМНЕ како демо-христијанска партија е обременета со националните прашања, но од друга страна таа беше изоставена од преговорите со Грција и не сноси вина за евентуалните негативни аспекти на Преспанскиот договор.
– Не би ги потценил граѓаните кои се свесни дека е преризично да се отстапи од Преспанскиот договор. Во поглед на претстојните евроинтеграции и особено поради тоа што тоа е уставна категорија, а прашање е дали ВМРО-ДПМНЕ може да смета на двотретинска поддршка за промена на Уставот, доколку намерата е да се излезе од условите договорени со Преспанскиот договор – додава аналитичарот.
Тој смета дека однесувањето на претседателката Гордана Силјановска – Давкова, која на инагурацијата одби во заклетвата да го каже уставното име, како и коментарите на премиерот Мицкоски околу придавката Северна, не се случајни и според него се подготовка за нова преговарачка позиција.
– Мислам дека во политиката нема случајност и мислам дека тоа беше можеби еден тактичко-стратешки потег на ВМРО-ДПМНЕ, да можеби почувства колкава е сензибилноста на прашањето и на соседите поврзана со нас и со името. До каде дојден тој процес во атмосферата во тие две општества. И второ мислам дека станува збор за јакнење на преговарачката позиција на државата во однос на соседите, бодејќи во претходното раководство на СДСМ и по дома се користеше уставното име – изјави Стефановски.
Целиот разговор со нашиот гостин, проследете го на следниот линк: