Грција, Турција, Црна Гора, Албанија… се дел од летните туристички дестинации кои ги одбраа нашите сограѓани за летен одмор. Поголемиот дел од анкетираните се грижат за физичкиот изглед и важно им е како ќе изгледаат на плажа, дел пак го занемаруваат тоа и фокусирани се само на одморот. Помладите се ангажираат со посебна исхрана и со активно посетување на теретана, пешачење и сл.

 – Јас оваа година ќе одам во Аланија, Турција. Важно ми е како изгледам на плажа, па затоа сега активно одам во теретана и внимавам што јадам пред одмор. Секоја година си купувам и нов костим за капење, но не ми е важно да биде од најнова мода. Ние сме жени и мислам дека навистина треба да внимаваме како изгледаме – вели една млада девојка пред камерата на „Слободен печат“.

Млад скопјанец ни одговори дека ќе оди на одмор со другарите на крајот од летото.

 –  Со тројца другари решивме да одиме во Црна Гора и Хрватска, мислам дека е добар избор за нас вака млади. Важно ми е да изгледам убаво на плажа, внимавам колку што можам, јас не одам во теретана, но другарите веќе почнаа активно да посетуваат теретана – вели тој.

Сретнавме и едно семејство од Радовишко, тие фамилијарно уплатиле во Турција, заминуваат за неколку дена.

– Оваа недела летаме за Турција цела фамилија, јас жената, синот, снаата и внуците. Секако дека е важна кондицијата, ние преку физичка работа се одржуваме во форма. Сопругата си купи и нов костим за капење, подготвени сме за на плажа – рече господинот.

Целата анкета можете да ја погледнете во продолжение: