Механичар на лифт кој работи во Музејот на модерна уметност – ЛАМ во холандскиот град Лисе, случајно фрлил уметнички експонат мислејќи дека е ѓубре.

Уметничкото дело со наслов „Сите добри времиња што ги поминавме заедно“ на францускиот уметник Александар Лаве се состои од две навидум користени лименки пиво, но кога ќе погледнете повнимателно, ќе видите дека вдлабнатите и празни лименки се внимателно насликани рачно, исвестува „НЛ Тајмс“.

Музејот објави дека делото од 1988 година е извадено од ѓубрето и не е оштетено.

„За уметникот Александар Лаве, лименките ги симболизираат неговите драгоцени моменти со пријателите. Вечерите поминати заедно со пиење можеби не изгледаат посебни, но на крајот тие се вредни моменти кога луѓето се поврзуваат едни со други“, се вели во соопштението на музејот.

Музејот ЛАМ ги изложил конзервите во стакленото окно на лифтот како да биле оставени за време на изградба, а механичарот помислил дека тоа е вистински отпад и ги фрлил во корпата за отпадоци.

Меѓутоа, кустосот во музејот забележала дека експонатот недостасува и започнала потрага. Лименките биле пронајдени во вреќа за ѓубре.