Најмалку 15 луѓе загинаа во нелегален рудник за злато во индонезиската провинција Западна Суматра по лизгање на земјиштето предизвикано од обилните дождови, изјави денеска директорот на Службата за вонредни состојби во покраината, Ирван Ефенди.

Спасувачите се обидуваат да пронајдат десетици луѓе кои се водат за исчезнати, пренесува Ројтерс.

„Жртвите се локални жители кои рачно копаат злато“, изјави индонезиски функционер, додавајќи дека во моментот на уривањето во рудникот имало 25 луѓе, од кои 15 загинале, додека тројца се повредени, а неколку десетици се уште се водат како исчезнати.

Нелегален рудник за злато во областа Солок се урна по лизгање на земјиштето вчера вечерта по обилните врнежи, рече Ефенди, додавајќи дека на спасувачите им биле потребни осум часа да стигнат до местото на несреќата, до кое не може да се стигне по пат.

Полицијата и армијата рано утринава ја започнале потрагата по исчезнатите и евакуацијата на загинатите.

Несреќите во малите и диви рудници во Индонезија се чести, потсетува британската агенција, наведувајќи дека минералните суровини најмногу се наоѓаат во оддалечените области.