Вчера се потпиша договор меѓу СОНК и Владата за покачување на платите во образованието. Марјан Ристески, претседател на Конфедерација на синдиклни организации, за Утрински брифинг вели дека во рамките на Конфедерацијата постои Независен синдикат за образование и нивниот став е дека СОНК требаше да издржи во штрајкот повеќе и да настапи похрабро, оти веќе 10 отсто беа договорени.

– Јавно кажувам дека не е добро протестот во образованието да се прекине за само тие 2 отсто разлика, тоа не е добро за работниците. Не би го обвинил само СОНК туку и Владата кои треба посериозно да го сфатат штрајкот. И ние сме правеле протести и сме ги повикувале нашите членови да ги поддржат протестите што ги прават другите синдикати. Работниците се единствени. Но, кај некои синдикални лидери се чувствува дека има политика и сѐ додека има политика во синдикатите тие нема да бидат како во Европа. Секоја опозиција сака да си го присвои секој штрајк, но за тоа е виновна Владата која ги турка синдикатите во прегратки на опозицијата, вели Ристески.

Тој вели дека главниот проблем настанал кога се зголеми минималната плата. Преговорите ги водеше ССМ и минималната плата беше предизборно ветување што се исполни по изборите, вели Ристески.

– Требаше заеднички сите синдикати да учествуваат во преговорите и да се договори начинот на кој потоа ќе се зголемуваат другите плати по сектори, додава тој.

Ставот на Конфедерацијата е да учествуваат во заеднички акции, но кога ќе почувствуваат дека има политика, дека нешто не е како што треба се договараат како ќе постапат.

– Треба да има реален социјален дијалог со Владата со сите синдикати, а не само со репрезентативен. Ако Владата нѐ остави самите да се организираме, ние се организираме вака на штрајкови и протести затоа што работниците се незадоволни, вели Ристески пред утрешниот штрајк на вработените во Управата за водење матични книги.

Проследете го целиот разговор во видеото