Торино не го престигна на врвот на табелата во Серија А гигантот од тој град, Јувентус, откако во шестото коло од најсилното италијанско фудбалско првенство на домашен терен беше поразен од Лацио – 2:3.

Гостите беа подобриот ривал, поведоа со 2:0, по головите на Гендузи во осмата минута и Дие во 60 минута. Сепак, шансата за 3:0 Кастеланос ја загуби поради неверојатната одбрана на голманот на „биковите“ Алберто Палеари.

Торино брзо реагираше и ја намали предноста од контранапад во 67 минута, со голот на Че Адамс по додавањето на Влашиќ.

Сепак, Лацио беше подобар ривал, во 90 минута Нослин ја врати предноста од два гола на гостите. До крајот на мечот Торино успеа само да го ублажи поразот преку Коко во втората минута од судиското надополнување.

На табелата во Серија А „биковите“ по првиот пораз сезонава се на четвртото место со 11 бодови, еден повеќе од Лацио на шестата позиција.