Постои сценарио во кое Левица би го поддржала вметнувањето во македонскиот Устав на нашите сограѓани од бугарска националност, но тоа мора да биде реципроцитет, вели портпаролот на Левица Амар Мециновиќ.

– Но толку сме далеку од тоа сценарио и не е вредно да се коментира. Иако помеѓу Левица и ВМРО-ДПМНЕ може да се повлече некаква паралела бидејќи сме во опозиција, но очигледно дека та паралела е сè поматна бидејќи знак еднакво може да се стави помеѓу ВМРО-ДПМНЕ и СДСМ. Зошто го зборуваме ова, бидејќи Левица веќе две години во континуитет бара прекин на преговорите со Бугарија, не од друг мотив туку знаеме од политичка интуиција каде водат овие работи, а водат до нарушување и губење на суверенитетот на Република Македонија – изјави Мециновиќ.

Левица е проевропска партија, тврди Мециновиќ, но вели дека на Македонија и направена неправда, бидејќи за прв пат во политиката на проширување на ЕУ, земјите членки ќе можат да ги менуваат веќе затворените поглавја. Вели и дека преговорите со ЕУ нема да прекинат, доколку ние ги прекинеме преговорите со Бугарија.

– Во септември бевме на состанокот на европската левица во Брисел, со другите левичарски партии од Европа и тоа што можевме да го заклучиме е дека оваа субординирана позиција во која се наоѓаме е резултат на континуираното владеење на ВМРО-ДПМНЕ, СДСМ и на ДУИ, односно откако сме земја кандидат – вели тој.

Мециновиќ тврди и дека Левица би можела сериозно да се нафати со управувањето на државата, доколку во иднина ја добие довербата на електоратот, но и дека оваа партија нема намера да влегува во коалиции со партиите од власта или со ВМРО-ДПМНЕ. Вели дека Левица има платформа и само по тој основ би можела да влегува во коалиции.

Целото интервју со Амар Мециновиќ погледнете го на следниот линк: