Рускиот напад врз Украина се случи во моментот кога во Њујорк, членките на Советот за безбедност на Обединетите Нации се обидуваа да дојдат до дипломатско решение на руско-украинската криза.

Украинскиот амбасадор Сергеј Кислиција во своето излагање му се обрати на рускиот амбасадор кој претседаваше со Советот за безбедност со зборовите:

-Кога доаѓав овде пред еден час сакав да го прашам рускиот амбасадор официјално да каже дека руската војска нема да пука во Украинците и дека нема да продолжи да напаѓа. Но тоа стана бескорисно по 48 минути зошто пред 48 минути вашиот претседател и објави војна на Украина. Сакам да му се обратам на рускиот амбасадор да му потврди официјално дека во овој момент вашите бомби не гранатираат и бомбардираат украински градови, дека вашите војници не навлегоа на украинска територија. Имате мобилен телефон и ве молам веднаш да му се јавите на Лавров, му рече украинскиот амбасадор на рускиот Небензија, а потоа продолжи со молба до членките на  Советот за безбедност да ја сменат Русија од претседавачкото место со Советот, за да може другите, одговорни и чесни членки да ја запрат војната во Украина.

-Руската Федерација треба да се откаже од одговорностите на претседавач со Советот за безбедност. Пренесете ги овие одговорности на легитимен член на Советот за безбедност. Членка која ја почитува Повелбата. И ги молам членовите на Советот за безбедност веднаш да свикаат итен состанок. И разгледајте ги сите неопходни одлуки за да се запре војната. Зошто е предоцна, драги мои да зборуваме за ескалација, предоцна е, рускиот претседател прогласи војна. Вие прогласивте војна и ваша одговорност е да ја запрете. И ве повикувам сите вас што сте тука да ја запрете војната, рече Кислиција.

Следуваше одговор од рускиот амбасадор Василиј Небензија кој претседава со СБ на ОН:

-Будење на господинот Лавров во ова време не планирам. Ова не е војна ова е специјална воена акција во Донбас, рече Небензија.

Во продолжение на украинско – руската дебата за започнатите руски воени дејства во Украина, украинскиот амбасадор побара од Небензија „да се откаже од функцијата претседател“.

– Нема чистилиште за воени злосторници. Одат право во пеколот, амбасадоре – рече Кислиција, по што рускиот колега уште еднаш му повтори дека Русија спроведува само „специјална воена операција“ и дека Русите „не се агресивни кон украинскиот народ, туку кон хунтата што е на власт во Киев“.

Погледнете ја оваа полемика меѓу украинскиот и рускиот амбасадор: