Обидот за воен удар во Боливија заврши со апсење на неговиот организатор, генералот Хуан Хозе Зунига, а воените единици испратени од него против претседателската палата во главниот град Ла Паз се повлекоа од централниот плоштад Муриљо.

Претседателот на јужноамериканската земја, Луис Арс, го осуди „обидот за државен удар“ и повика на меѓународна поддршка.

Синоќа воените единици, предводени од генералот Зунига, кој во меѓувреме беше сменет од функцијата командант на боливиската армија, се собраа на плоштадот Муриљо, каде се наоѓа резиденцијата на шефот на државата.

„Денес земјата се соочува со обид за државен удар. Денес, повторно, земјата се соочува со интереси кои се над демократијата. Боливискиот народ е повикан да дејствува денес. Ни имаме потреба Боливијците да се организираат и мобилизираат против државниот удар во служба на демократијата“, рече Арсе.

Снимките на боливиската телевизија го покажаа Арс во ходникот на Палатата како се соочува со командантот на армијата Хуан Хозе Зунига, кој изгледа дека го предводи бунтот: „Јас сум твојот врховен командант и ти наредувам да ги повлечеш своите војници и нема да дозволам оваа непослушност!“, рече Арс.

Пред да влезе во зградата на Владата, Зунига им рече на новинарите на плоштадот: „Сигурно наскоро ќе има нов кабинет на министри; нашата држава не може да продолжи вака“. Зунига рече дека, засега го признава Арсе како врховен командант.

Зунига не кажа експлицитно дека тој го предводи пучот, но рече во Палатата, среде звучни удари, дека армијата се обидува „да ја врати демократијата и да ги ослободи нашите политички затвореници“.

Во пораката на платформата X, претседателот на Боливија Луис Арсе повика на „почитување на демократијата“ кога боливиската телевизија покажа два тенкови и неколку мажи во воени униформи пред Палатата.

„Не можеме да дозволиме уште еден обид за државен удар да ги одземе животите на Боливијците“, рече тој од внатрешноста на палатата, опкружен со владини претставници, во видеопорака испратена до боливиските и светските медиуми.

Поранешниот претседател Ево Моралес, исто така во порака на Платформата Х, го осуди потегот на армијата на плоштадот Мурило пред Палатата, нарекувајќи го државен удар „во подготовка“.

Марија Нела Прада, министерка на претседателството и висок боливиски функционер, го нарече „обид за државен удар“ и оцени дека „народот е подготвен да ја брани демократијата“.

Инцидентот предизвика бран на гнев кај другите лидери во регионот, вклучително и Организацијата на американски држави, а обидот за пуч го осуди претседателот на земјата сосед Чиле Габриел Бориќ, раководството на Хондурас и поранешните боливиски лидери.

Боливија, земја со 12 милиони жители, во последните месеци се соочува со бран на масовни протести поради ненадејниот пад на економијата. Земјата, која пред две децении важеше за од една од најбрзо растечките економии на континентот, стана држава која најтешко беше погодена од економската криза.

Боливија се соочи и со раскол од висок профил на највисоките нивоа на владејачката партија. Актуелниот претседател Арс и неговиот поранешен сојузник, левичарската икона и поранешен претседател Моралес, се борат пред изборите во 2025 година за иднината на владејачкото Движење за социјализам (МАС).