Советникот за национална безбедност на американскиот претседател Џејк Саливан во понеделникот потврди дека Белата куќа е загрижена поради „континуираните сецесионистички закани“ на Милорад Додик и најави дека американската влада ќе одговори на таквите закани.

Во објава на социјалната мрежа Икс, Саливан се огласи откако Додик минатата недела потврди дека властите на Република Српска подготвиле предлог за договор за „мирно раздружување“ на БиХ, кој имаат намера да го испратат до Федерацијата БиХ за коментар.

The U.S. is concerned by the increased threats to Bosnia & Herzegovina’s territorial integrity from Republika Srpska President Dodik. We will continue to respond to secessionist actions & attacks on the Dayton Peace Agreement, including through the use of additional sanctions.

— Jake Sullivan (@JakeSullivan46) July 1, 2024

Содржината на тој документ се уште не е објавена, а Додик рече дека предвидува преоден период од три до пет години во кој, според неговите планови, двата ентитета со договор ќе одлучуваат за престанок на постоењето на БиХ како држава.

Саливан на ова одговори со порака дека САД се загрижени поради зголемените закани на Додик за територијалниот интегритет на Босна и Херцеговина.

„Ќе продолжиме да одговараме на сецесионистичките акции и активности и напади врз Дејтонскиот договор, вклучително и наметнувањето нови санкции“, напиша клучниот советник на претседателот Џо Бајден.

Саливан, исто така, истакна дека САД силно го поддржуваат високиот претставник за БиХ, Кристијан Шмит, да ги користи своите широки овластувања секогаш кога ќе биде нападнат Дејтонскиот договор, како и дека Вашингтон стои покрај граѓаните на БиХ и ги поддржува напорите нивната земја да се приклучи на евроатлантските интеграции.