Укината старосната граница: На натпреварот за Мис Универзум во Јужна Кореја учествува и 80-годишна жена
На натпреварот за претставничка на Јужна Кореја за Мис Универзум учествува и 80-годишната Чои Сун-хва, која е и најстарата учесничка досега по укинувањето на старосната граница за учество.
Чои беше претставена претходно овој месец како една од 32-та финалистки на годишниот избор за убавина, чиј победник ќе ја претставува земјата на финалето на Мис Универзум во Мексико во ноември, објави Си-eн-eн.
Таа за американската телевизиска мрежа изјави дека со учеството на натпреварот сака да покаже дека е можно да се одржи здравјето и убавиот изглед и во староста.
Чои, која има три внуци и ќе наполни 81 година следниот месец, за Си-eн-eн изјави дека е возбудена што ќе ја претставува својата земја во странство, наведувајќи ја поддршката од нејзините деца и внуци.
Со децении, Мис Универзум спроведуваше строги ограничувања за возраста и им дозволуваше на жените на возраст меѓу 18 и 28 години да учествуваат, но од оваа година горната старосна граница е укината поради зголемените повици за модернизација.
Минатата година организацијата ја укина долгогодишната забрана за учество на трудници, мајки и жени кои се во брак или разведени.
На изборот за Мис Универзум во Канада годинава учествуваше 58-годишна жена, а во Аргентина 60-годишна жена.
Во моментов најстарата учесничка во финалето во Мексико е 40-годишната Беатрис Нјоја од Малта, која е мајка на три деца, иако уште неколку земји допрва треба да ги изберат своите претставници.