На долгата прес-конференција одржана пред куп американски знамиња во кулата Трамп, републиканскиот претседателски кандидат рече дека планира да се сретне со Володимир Зеленски утрово – и ја критикуваше Европа дека е скржава кога станува збор за Украина, пишува Политико.

„Европа плаќа само мал дел од парите што ги плаќаат САД, а ние имаме океан меѓу Русија и нас; тие не плаќаат“, рече Трамп, повторувајќи го она што претходно го кажа.

„САД го плаќаат најголемиот дел, а Европа не. Тоа е многу неправедно кон САД“.

Преминувајќи на друга омилена тема  за разговор, Трамп постојано опишува како барал европските сојузници во НАТО да придонесат повеќе за алијансата кога тој беше претседател на САД, навестувајќи дека ќе го стори истото кога станува збор за борбата на Украина против руската инвазија.

„Европските нации треба да се изедначат, треба да платат. Ова го направив со НАТО. Ги натерав сите да платат. Реков, ако не платиш, нема да бидеме таму. И парите стигнаа“.

Зеленски, од своја страна, го заврши денот на состаноци во Вашингтон, вклучително и со претседателот Џо Бајден, потпретседателката Камала Харис и двопартиска група членови на Конгресот, додека се обидува да обезбеди воена и финансиска поддршка за Украина пред изборите во ноември.

Бајден најави повеќе од 8 милијарди долари воена помош за Киев пред состанокот во четврток, а Харис додека стоеше до Зеленски рече дека „борбата на Украина е важна за американскиот народ“.

Но, Киев е загрижен дека обврските на САД кон Украина се намалуваат како што војната се одолговлекува, особено меѓу републиканците.

Дури и ако Харис победи на изборите, Конгресот сè уште игра клучна улога во давање зелено светло за Украина.

Трамп ја искористи својата прес-конференција во четвртокот за да го повтори своето фалење дека рускиот претседател Владимир Путин немаше да започне целосна инвазија на Украина доколку беше во Белата куќа и тврди дека можел да донесе мир.

Велејќи дека „многу добро го познава рускиот автократ“, Трамп инсистираше: „Верувам дека ќе можам да склучам договор меѓу претседателот Путин и претседателот Зеленски прилично брзо“.

Запрашан дали тоа би вклучило Украина да ѝ отстапи одредена територија на Русија, тој одговори: „Ќе видиме што ќе се случи… ајде да постигнеме мир; ни треба мир“.

Иако европските земји значително ги зголемија своите воени трошоци за Украина, а земјите како Германија драстично ги зголемија буџетите за одбрана, САД остануваат најголемиот финансиски и воен покровител на Украина.

Бајден оваа недела рече дека следниот месец ќе биде домаќин на состанокот на Контакт групата за одбрана на Украина со сојузниците во Германија.