Суптилната иронија во драматиката на Мрожек ја носи книгата „Драмски дела“ во издание на „Перун Артис“
Неодамна од печат излезе книгата драми на познатиот полски драматичар и прозаист Славомир Мрожек под наслов „Драмски дела“ во издание на „Перун Артис“.
Она што најмногу плени кога го читаме Мрожек е неговиот горчлив хумор обвиткан во суптилната иронија, чиј апстракт е секогаш главниот двигател на неговите драмски дела. Целата негова драматика е собрана во тој ирониски механизам, создавајќи дијалог што реалитетот го прекршува низ огледалото на политичката и социјална алогичност и деструктивност.
Нам ни е препознатлив по неговите најзначајни драмски дела, како „Танго“, „Полицајци“, „Пеш“ итн., но во оваа книга се драмите од неговата последна фаза: „Преподобните“ и „Прекрасна глетка“ каде што тој се занимава со религијата и тероризмот, како теми што се најгорливи во дваесет и првиот век.
Напишани на самиот почеток на новиот век, и двете пиеси се занимаваат со аномалијата на човековата неукост и самодеструкција, и двете се полни со густи дијалози изговорени од комплексните ликови чие внатрешно страдање е големо, но и чија духовна дисторзија е рамна на цивилизациска катастрофа.
(Текстот е објавен во „Културен печат“ број 242, во печатеното издание на весникот „Слободен печат“ на 10-11.8.2024)