Десет луѓе загинале денеска во експлозија на бензинска пумпа во руската република Дагестан, а меѓу жртвите се и две деца, соопшти руското Министерство за вонредни ситуации.

Експлозијата се случила пред регионалниот главен град Махачкала, по што избувнал пожар кој бил ставен под контрола од страна на 120-те ангажирани спасувачи и пожарникари. Уште десетина луѓе се повредени, пишува во соопштението објавено на Телеграм.

Осуммина од повредените се во болница, а еден од нив е во тешка состојба, изјави претставник на Министерството за здравство за руските новински агенции.

Дагенерго, регионалниот енергетски оператор, објави дека експлозијата оштетила „енергетски капацитети“ и дека снабдувањето со електрична енергија е делумно прекинато во околните области.

Надлежните институции отворија кривична истрага за утврдување на околностите на инцидентот.

Лани во август, во експлозија и пожар на бензинска пумпа во предградие на Махачкала, загинаа 35 луѓе, а 119 беа повредени.