Книгоиздателството „Матица“ ја објави стихозбирката „Врне ли, врне“ од поетот Ристо Лазаров, негова 39-та поетска книга со која се одбележуваат 75 години живот на авторот (3 октомври) и 50 години творештво.

„Најновата книга на Лазаров содржи вкупно 75 песни поместени во десет циклуси. Авторка на поговорот е Лидија Капушевска-Дракулевска, која посебно ја истакнува асоцијативноста на книгата. ’Стилската разиграност на поетскиот дискурс на Лазаров‘, пишува Капушевска-Дракулевска, ’во интеракција со шареноликиот тематски потход, одат во прилог на космополитизмот на книгата. Поетскиот немир не е никогаш само и единствено личен, колку и да тргнува од индивидуалното искуство, а поетскиот глас е глас на целото‘“, наведува „Матица“ во соопштението за новата книга на Ристо Лазаров.

Ристо Лазаров е роден на 3 октомври 1949 година во Штип, Република Македонија. Дипломирал југословенска книжевност и македонски јазик на Филолошкиот факултет во Скопје. Автор е на повеќе книги поезија, огледи, есеи и публицистички трудови. Објавени му се и „Избрани дела“ во четири тома.

Негови книги се објавувани на англиски, албански, бугарски, српски, чешки, словенечки јазик. Одделни циклуси песни му се објавувани и на германски, француски, шведски, турски, романски, унгарски и на други јазици. Застапуван е во сите релевантни антологии на современата македонска поезија.

(Текстот е објавен во „Културен печат“ број 249, во печатеното издание на весникот „Слободен печат“ на 28-29.09.2024)