Стихозбирката „Грозје од кукавица“ од Славе Ѓорѓо Димоски воспоставува однос помеѓу политиканството и поезијата
![](https://www.slobodenpecat.mk/wp-content/uploads/2024/06/Slave-Gjorgjo-2024-Grozje-02-Promo.jpg)
Најновата стихозбирка „Грозје од кукавица“ од поетот Славе Ѓорѓо Димоски од Велестово ќе биде промовирана на 27 јуни, од 19 часот, во кафе и бар „Шила“ во Охрид. Промотор на книгата ќе биде Јулијана Величковска од „ПНВ Публикации“.
Книгата „Грозје од кукавица“ излезе во издание на „ПНВ Публикации“ од Скопје и претставува завршен дел од трилогијата со неоангажирана (терминот е од авторот) поезија (другите две книги се „Извештаи на Рисот“, 2016 г., и „Јазик и леб“, 2019 г.), бидејќи во однос на класичната ангажирана поезија, која често е и патетична, овде се пародираат општочовечки и национални теми, како стравот, сомнежот, свеста дека е изгубена секоја надеж, химната, најпознатата реченица на Делчев, дека владее логиката на интересот, а не логиката на моралните вредности итн.
Во книгата се воспоставува однос помеѓу политиканството (бидејќи кај нас нема политика) кое шири разочарувачки дехуманизирани сигнали и поезијата, која е нешто последно што може да ја спаси чистата човечка свест.
Славе Ѓорѓо Димоски (1959, Велестово, Охрид) завршил Филолошки факултет при Универзитетот „Св. Кирил и Методиј“ во Скопје. Основач е и претседател на манифестацијата „Поетска ноќ во Велестово“, бил претседател на Управниот одбор на Национална установа Струшки вечери на поезијата. Член е на ДПМ, на македонскиот ПЕН центар и на академијата „Анте Поповски“.
Автор е на деветнаесет стихозбирки, на шест книги за деца, на повеќе книги есеи и активно препејува. Негови поединечни песни и поетски циклуси се преведени на над триесетина јазици, а 19 одделни книги му се преведени на англиски, руски, српски, турски, шведски, хрватски, полски, азерски, бугарски и други јазици.
Наградуван е со повеќе домашни и меѓународни награди и признанија, меѓу кои „Браќа Миладиновци“, „Ацо Шопов“, „Антево перо“, „Григор Прличев“ за најдобра поема, Гран-при „Исток-запад“ (Романија), „Сергеј Есенин“ (Русија) и други, а застапуван е во сите антологии на македонската поезија објавени во Македонија и низ светот по 1982 година.