Во Виена започна судењето на Србинот, кој минатата година предизвика тешка сообраќајна несреќа дивеејќи со 120 километри на час низ улиците на австрискиот главен град. Тој преминал на спротивната лента и покосил семејство од Романија. Србинот направил неколку сообраќајни несреќи, при апсењето немал возачка дозвола, а возел и со лажни регистарски таблички.

Според српските медиуми, нему му се суди за убиство во обид, а во процесот го брани познатиот австриски адвокат Руди Мајер. На вчерашното рочиште сведочел и таткото на семејството.

„Тој ден отидов на божиќниот саем со моето семејство. Одеднаш видов светла и се сеќавам само дека се активираа воздушните перничиња. Сигурно возеше со над 100 на час, среќа е што преживеавме“, рекол Романецот.

Потоа рекол дека сѐ се случило брзо и дека немал време да реагира.

“Се здобив со повреди на ребрата и зглобот. Имав болки со месеци. Бев среќен кога успеав да се измијам по долго време”, рекол тој.

Како се случило сѐ, раскажала и неговата сопруга, а за тоа време обвинетиот Србин немо ги гледал од клупата.

Судскиот процес за убиство во обид ќе продолжи и во наредните денови.