Современата балетска бајка за сите возрасти „Пепелашка“ од Сергеј Прокофјев на 27 септември, со почеток во 20 часот, ќе се изведе на сцената на Националната опера и балет.

Приказната за „Пепелашка“ преточена во прекрасната музика на големиот руски композитор Сергеј Прокофјев е во кореографија на гостинот од Србија Александар Илиќ.

Костимографијата е на Катерина Радошевиќ Галиќ (Хрватска), сценограф е Филип Коруновски. Дизајнот на звук е на Георг Драушник (Хрватска), додека дизајнот на светло е на Милчо Александров. Асистент-кореографи се Саша Евтимова и Мојца Мајцен (Словенија), репетитори се Саша Евтимова и Дафина Данилоска-Кочевска, а асистент-костимограф е Ангела Богеска.

Приказната за „Пепелашка“ на нашата сцена ќе ја пренесат: Наташа Трендафилова Гицев (Христина Наќевска), Игор Веланоски, Саша Евтимова, Ангела Богатинова, Ендру Кук (Англија), Кристијан Јангос, Драган Кочоски, Гала Кочевска, солисти и балетскиот ансамбл на Националната опера и балет.

Александар Илиќ, кореографот на балетот „Пепелашка“, посочува дека оваа поставка на „Пепелашка“ не е класична верзија, туку е создадена во еден посовремен контекст.

– Нашата „Пепелашка“ ја сместивме во една потполно поинаква временска рамка, во 70-тите години на минатиот век. Поточно, во време на популарноста на филмот „Брилијантин“, со најпознатата улога на Џон Траволта, и со самото тоа се поигравме со нашата „Пепелашка“ во тоа време – истакнува Илиќ.