Сопственикот на стрелиште каде што Коста К. научил да пука е осуден на пет месеци домашен затвор
![](https://www.slobodenpecat.mk/wp-content/uploads/2024/04/kosta-kecmanovik.jpg)
Петмесечна казна домашен затвор му беше изречена денеска од Вишиот суд во Белград на Ратко Ивановиќ, сопственикот на стрелиштето каде што малолетникот кој го изврши масакрот во училиштето „Владислав Рибникар“ научил да пука, јавија белградските медиуми. Ивановиќ е прогласен за виновен за кривичното дело давање лажен исказ, објавија од тој суд. Пресудата е донесена по спогодба со Судот.
Казната ќе ја издржува во просториите каде што живее и кои не смее да ги напушти, освен во случаите пропишани со Законот за извршување на кривичните санкции, без користење електронски надзор.
Јавните обвинители, обвинетиот и неговите бранители се откажаа од правото на жалба на таа одлука, и таа е конечна.
За овој случај, судењето на родителите на момчето и инструкторот на стрелиштето продолжува. За давање лажен исказ е обвинет и инструкторот на стрелиштето, Немања Маринковиќ.
Малолетниот К.К. на 3 мај минатата година уби девет соученици и еден училишен чувар во училиштето „Владислав Рибникар“ во Белград. Со оглед на тоа дека во моментот на убиството имал 13 години, К.К. не може кривично да биде гонет.