Собарки, готвачи, хостеси, садомијачи – трк кон Црна Гора, ве чека заработувачка од 800 до 1.100 евра!
![Свети Стефан Црна Гора](https://www.slobodenpecat.mk/wp-content/uploads/2021/04/budva.jpg)
Сезонските работни места на брегот стануваат сè попопуларна идеја, особено со зголемените цени на летните аранжмани. Порталот Нова.рс. провери што се нуди моментално кога е во прашање црногорското приморје. Ако ги погледнете актуелните огласи за сезонски вработувања на црногорското приморје, за повеќето од нив навистина не ви е потребно никакво претходно работно искуство.
Платите се од 700 до 1.000 евра, со обезбедено сместување и исхрана. Секако, професионалните готвачи сепак можат да добијат многу подобра понуда, пренесува Нова.рс. Обезбедено е сместување и храна, работно време 8 часа, плата 800 евра – се нагласува во огласот во кој се бара собарка во Улцињ. Во Котор за иста плата се бара „сериозна и одговорна жена со најмалку една година искуство во одржување на хотелски соби“, со тоа што постои можност за трајно вработување.
На асистентите во кујната на ресторан во Будва (и брза храна) не им треба никакво претходно искуство. Обезбедено е сместување и храна, платата е 800 евра. Тоа е работа со полно работно време, а работата вклучува помагање при подготовка на палачинки, салати и други јадења како што ќе нареди готвачот, сервирање храна и чистење на кујната.
Ниту за миење садови на Јаз не е потребно посебно искуство, а платата е 850 евра. Во огласите за сезонски вработувања се појавува „чувар со дежурства“, а доколку не сте сигурни што точно значи тоа – прилично добар опис на работното место најдовме во огласот на еден ресторан во Будва. Платата е 800 евра, со обезбедено сместување и два оброка, а обврските на вработениот го вклучуваат следново: „зацврстете ги чадорите, распоредете ги лежалките во низа, прецизно, направете го потпирачот на лежалките ист, преместете ги лежалките, исчистете ги масите на плажата, соберете го ѓубрето, полевајте ги цвеќињата, изметете го шеталиштето, изметете ги терасите, отворете ги големите чадори на терасата, украсете ги масите. И еднаш на секои пет дена измијте ја целата тераса за брза храна и делот зад кујната со машина“.
Келнер во Чањ може да заработи 1.000 – 1.100 евра месечно, доколку е комуникативен, љубезен, го знае процесот на работа во ресторан и е подготвен да работи 9 часа дневно, 7 дена во неделата. Се бараат и хостеси за работа на повеќе локации на црногорското приморје, понудената плата е 1.000 евра.