Тимот на Кафе и филм „Котур“ го подготви шестото издание на „Ѕирни“ – Фестивал на филм и музика. Од 30 септември до 10 октомври ќе се одржи коктел од филмови, концерти, театарски претстави, интервјуа, изложби, вкусна храна и внимателно селектирана музичка програма.

Од оваа година официјалната селекција на кратки филмови, кои се натпреваруваат за наградата „Данчо Чеврески“, станува интернационална. Се воведува уште еден натпреварувачки дел во програмата – интернационални кратки студентски филмови.

На шестото издание на фестивалот по вторпат ќе се одржи и 48-часовниот филмски предизвик. На програмата ќе бидат филмови со маестралните улоги на актерот Мето Јовановски со филмските проекции на „Тетовирање“ и „Среќна нова ’49“.

Покрај кино салата на Кафе и филм „Котур“, оваа година фестивалот ќе се одржи и на нови локации. Филмови од официјалната селекција и концерти на „Аудио цигла“ и „Фанк шуи“ ќе се одржат на Плочник (во блокот на Градски ѕид веднаш до Соборниот храм), а театарската претстава „Кенди“ ќе биде изведена во „Лабораториум“.

Официјалното отворање на фестивалот е на 30 септември, од 19:30 часот, на Плочник со проекција на „Дали си маж“, краток игран филм на режисерот Ѓорче Ставрески, а во исто време во Кафе и филм „Котур“ ќе биде отворена изложба на аналогни фотографии со наслов „Мозаик во зрно“ од Љубомир Трајковски.