Независниот синдикат на фабриките „Стелантис“ во Крагуевац не може да потврди дека масовното производство на електромобилот „Гранде панда“ ќе започне во октомври, како што беше споменато претходно, објави Бета.

„Сега гледам дека никој во фабриката не го спомнува октомври. Треба да се сретнеме со директорот на фабриката, па ќе видиме дали ќе добиеме прецизни информации“, изјави претседателот на Синдикатот Саша Ѓорѓевиќ. Тој рече дека „засега го немаме октомври како месец кога ќе почне сериското производство“. Според него, во фабриката има 800 вработени, што сè уште не е бројката на работници кои треба да почнат со сериско производство.

„Сè уште сме во „фазата на подем“ на проектот пред почетокот на сериското производство кое ќе започне во следниот период, но во овој момент не можам да потврдам дека тоа ќе биде во октомври или подоцна“, рече Ѓорѓевиќ. Тој рече дека во фабриката на „Стелантис“ во Крагуевац работниците работат „нормално“ и нема вработени на платен одмор. Сите активности во фабриката се насочени кон подготовките за почеток на сериското производство на моделот.

Медиумите потсетуваат дека групацијата „Стелантис“ никогаш не го навела датумот на сериско производство на „Гранде панда“ во фабриката во Крагуевац.