ВИДЕО | Сиљановска-Давкова: Во армијата како институција со најголема доверба во државата е неопходно понатамошно вложување
Претседателката и врховен командат на Армијата Гордана Сиљановска-Давкова денеска го посети Генералштабот на армијата и Министерството за одбрана за прв пат откако беше избрана за претседател на државата.
По официјалниот пречек пред Министерството за одбрана, Сиљановска-Давкова оствари средба со министерот за одбрана Владо Мисајловски, началникот на Генералштабот на армијата, генерал потполковник Васко Ѓурчиновски, генералите во армијата и раководните лица во Министерството за одбрана.
Претседателката по посетата на социјалните мрежи напиша дека во Армијата како институција со најголема доверба во државата е неопходно понатамошно вложување за подобрување на условите за живот и работа во сите сместувачки капацитети.
-Очекувам дека Армијата, како и досега, ќе продолжи со истата посветеност да ја исполнува својата уставна должност да го штити територијалниот интегритет и независност, а армиските припадници да продолжат да бидат пример за професионализам, дисциплина и посветеност, како што доликува на земја-членка на НАТО – напиша Сиљановска-Давкова на социјалните мрежи.