Независната дискографска куќа „Шарла рекордс“ стигна до сто музички изданија, а во следниов период планира да одржи неколку лајв-сесии во „Ла Кања“ (во Старата скопска чаршија), на кои ќе бидат претставени дел од артистите чии албуми се објавени под оваа етикета.

– Дојдовме до сто изданија. Малку подоцна од што планиравме, но многу поскоро од нашиот влез во ЕУ, секако. Стопати е изречен зборот „ново“ со извичник, а тоа во средина што знае да биде отпорна на изјави од таков вид, и не е баш малку. Затоа, цениме дека сите овие години труд, љубов и заедништво треба да ги прославиме на адекватен начин, и со радост.

Прво, подготвивме славеничка компилација со наслов „Разни изведувачи – 100 врати отворени“, составена од музика на наши артисти и бендови како современ пресек во времето низ кое пловиме како пијан морнар во сѐ поплитка вода. Нашата цел постојано да отвораме врати кон нови и нови музички хоризонти се чини е тврдоглаво упорна и отпорна на сите штетни влијанија на општествено-политичката реалност во која се случуваме.

Во тоа име, почнуваме со серијал од концертни вечери во барот „Ла Кања“ под заедничко име – „Шарла летни сесии во живо“. Првиот настан ќе се случи на 5 јули (петок), со почеток од 21 часот, како промоција на компилацијата „Разни изведувачи – 100 врати отворени“ со акустични настапи во живо на три Шарла-артисти: „Дејание“, Сашо Митревски и „Свит рапскалионс“ (Sweet Rapscallions) – најави Давид Ангелевски од „Шарла рекордс“.

(Текстот е објавен во „Културен печат“ број 237, во печатеното издание на весникот „Слободен печат“ на 29-30.6.2024)