Се огласи Нетанјаху: Го елиминиравме Насрала, централниот мотор на иранската оска на злото
Во својот прв јавен коментар по смртта на водачот на Хезболах, Хасан Насрала, израелскиот премиер Бенјамин Нетанјаху потврди дека Израел стои зад нападот во Бејрут во кој беше убиен долгогодишниот водач на либанската проиранска милитантна група, рече оти неговата „елиминација“ била суштинска за да се овозможи безбедно враќање на жителите на северот на Израел.
Нетанјаху го нарече лидерот на Хезболах „централен мотор на иранската оска на злото“.
„Тој и неговиот народ беа креатори на планот за уништување на Израел“, рече израелскиот премиер.
„Бидејќи сè додека Насралах е жив, брзо би ја вратил силата што му ја одзедовме на Хезболах. Затоа ја дадов директивата и тој повеќе не е со нас. Израел е на потег“, изјави израелскиот премиер. Тој додаде дека со овој потег Израел ја „подмирил сметката“ со „масовниот убиец“ одговорен за убиствата на безброј Израелци и десетици американски и француски граѓани. Иако ги оцени за историска пресвртница, според Нетанјаху, „моќните удари“ на израелската војска врз Хезболах од оваа недела нема да бидат доволни.
„Граѓани на Израел, имаме големи достигнувања, но работата сè уште не е завршена. Во наредните денови ќе се соочиме со значајни предизвици, и ќе се соочиме со нив заедно “, рече Нетанјаху.
Тој го поврза атентатот со ситуацијата во Газа, тврдејќи дека Хамас ќе има поголема веројатност да ги ослободи израелските заложници ако види дека Хезболах е ослабен.