Ваков каков што е Предлог законот за задолжување на Република Северна Македонија со заем кај Унгарската експорт – импорт банка приватно друштво со ограничена одговорност по договор за заем за буџетско финансирање и финансирање на општи цели, по скратена постапка, нема да биде поставен на собраниската комисија за финансирање и буџет, дециден е претседателот на СДСМ Венко Филипче кој вчера одржа прес-конференција. Со Комисијата за финансирање и буџет, собраниско тело низ кое мора да помине Предлог-законот, раководи Сања Лукаревска од редовите на СДСМ, а опозиционерите инсистираат на носње на закон по редовна постапка, со дебата. Сепак, ВМРО-ДПМНЕ има можност Предлог-законот да се стави на дневен ред. Во членот 126 од новиот собраниски деловник за работа на работните тела од Собранието пишува: „Ако претседателот на работното тело не свика седница кога е должен тоа да го стори, или ако работното тело нема претседател, седницата ја свикува претседателот на Собранието и со седницата претседава членот на работното телото што ќе го определи претседателот на собранието, до завршување на седницата“. Значи клучот за овој закон сега е во рацете на собранискиот спикер Африм Гаши.
Премиерот Христијан Мицкоски рече дека очекувал опозицијата да ја опструира работата на собраниската Комисија за финансирање и буџет на која треба да се разгледува Предлог-законот за задолжувањето.

-Добив информација дека денеска нема претседателот на Комисијата за финансирање и буџет оваа точка да ја стави на дневен ред, тоа е Сања Лукаревска. Таков став заземале во СДСМ. Деловникот е јасен, има таму период кога треба да се стави оваа точка, доколку не се стави, што се прави итн. Тоа ќе прави. Опозицијата, претпоставувам Левица – ДУИ – СДСМ, ќе се обидат, дури мислам дека и на недемократски начин, да ја опструираат работата на Комисијата –рече Мицкоски.

Според премиерот „вистинската намера на опозицијата е стравот бидејќи ако овие средства ќе се вложат на начин на кој планираме да ги вложиме, ние ќе добиеме политички бенефит од сето ова и на тој начин преку реализација на проектите во општините и поддршка на бизнисот конечно, после долго време застој и уназадување, државата ќе почне да чекори напред“.

Мицкоски ја искористи и можноста за да се поправи во однос на пресметките на процентот на провизијата што ќе ја платиме за правните услуги на независна фирма избрана од страна на Унгарската експорт-импорт банка. Тоа немало да биде 0,1 процент како што рече вчера, туку 0,014 процент и тоа е за адвокатски услуги, процес што според изјавата на Мицкоски е стандарден за ваков тип на заеми. Во апсолутен износ овој трошок е 70.000 евра.