САД можат да ја притиснат новата влада во Бугарија, смета Павле Трајанов
„Ниту знаат што е држава, ниту знаат како да ги заштитат националните државни интереси“, изјави Павле Трајанов, претседател на Демократскиот сојуз, за поранешната влада предводена од СДСМ и ДУИ, од која дел беше и неговата партија.
Тој во гостување на „ТВ21“ околу „францускиот предлог“, од кој произлезе Преговарачката рамка со ЕУ, изјави дека решението го гледа во стратешките партнери на државата.
„Излезот од таква ситуација е да се разговара, да се добие поддршка од САД. Можат да извршат притисок врз новата Влада во Бугарија и да отворат некои прашања, ако ништо друго. Јазикот да биде официјален по прифаќањето, идентитетските прашања да имаат заклучок во Советот на ЕУ дека не можат да бидат основа за блокирање и трето да започне процесот на спроведување на одлуките на Судот во Стразбур за правата на Македонците“, вели Трајанов.
Тој вели дека СДСМ сакал да има монопол во преговарачкиот процес додека ја предводел владата и додаде дека најголемата грешка е што ВМРО-ДПМНЕ не била вклучена во тој процес.
„Доколку навистина се отвореа преговорите, ќе добиеја голема поддршка. Мислам дека од теснопартиски интереси без да се земат предвид стратешките и државните интереси, отидоа во Собранието со надглас да ја прифатат Преговарачката рамка. Тоа е основата зошто сега процесот не мрда, ништо друго“, додаде експратеникот и актуелен координатор во Владата, Трајанов.
За идејата за уставни измени, Трајанов оценува дека во моментов „нема соодветна клима тоа да помине“.