Русија нема да учествува на специјалната седница на Советот за човекови права на ОН
Русија нема да учествува на специјалната седница на Советот за човекови права на ОН во четврток за Украина, соопшти денеска нејзиното Министерство за надворешни работи.
Советот во понеделникот објави дека ќе одржи специјална седница на барање на Киев за да ја испита „влошената ситуација со човековите права во Украина што произлегува од руската агресија“.
Но, портпаролката на руското Министерство за надворешни работи, Марија Захарова, рече дека „руската делегација со своето присуство нема да го легитимира ова ново политичко шоу организирано под маската на вонредна седница“.
Таа рече дека аргументите и објаснувањата на Русија за „вистинските цели на оваа специјална воена операција и реалната ситуација на теренот се целосно игнорирани“.
„Очигледно е дека тие нема да бидат слушнати ниту овој пат“ за време на „новата антируска мерка на Западот“, рече таа.