Во Културно-информативниот центар на РС Македонија во Софија (ул. „Обориште“ бр. 7) на 4 јули, во 18.30 часот, ќе се одржи промоција на романот „Последното име на иднината“ („Антолог“, 2018) од македонскиот писател Живко Грозданоски.

За книгата, која ја трасира животната линија на тунелскиот инженер Јоха од Јена, Германија, ќе разговараат преведувачот Маријан Петров и авторот Грозданоски, кој ќе биде присутен на промоцијата. Во врска со објавата на книгата, исто така, ќе се обрати и книжевниот критичар и издавач на делото Пламен Тотев („Books4All“).

По „Куфер за тројца“ („Или-или“, 2014), кој беше преведен од Тања Попова и објавен во Бугарија во 2017 година, „Последното име на иднината“ е втор роман на Живко Грозданоски преведен на бугарски јазик.

Писателот Живко Грозданоски е актуелен претседател на Друштвото на писателите на Македонија.