Револуционерна технологија: Кинески научници создадоа куче робот за да им помогне на лицата со оштетен вид
![](https://www.slobodenpecat.mk/wp-content/uploads/2024/07/FotoJet-33.jpg)
Роботско куче водич, создадено од кинески научници од Универзитетот „Џиао Тонг“ во Шангај, е помалку влакнесто од вистинските кучиња и има шест нозе, а се смета дека еден ден може да им помогне на лицата со оштетен вид да водат понезависен живот.
Роботската верзија на кучето водич, која моментално се тестира во теренски услови, е способнa да се движи низ физичкиот свет преку камери и сензори и може да препознае семафори, што вистинските кучиња водичи не го можат, пренесува „Ројтерс“.
Кучето робот е приближно со големина на расата на кучиња – англиски булдог и со употреба на вештачка интелигенција интегрирана во технологијата за препознавање глас, планирање маршрути и идентификација на семафори, може да комуницира, слуша и разговара со лица со оштетен вид, а неговите три пара нозе му помагаат лесно да оди со максимална стабилност.
Сопружниците Ли Феи (41) и Жу Сибин (42) се лица со оштетен вид кои му помагаат на тимот научници да го тестираат кучето робот користејќи команди на кинески.