Револуционерна операција: На 13-годишно момче кое боледува од епилепсија му е вграден апарат во черепот за да ги потисне нападите
Момче од Велика Британија кое боледува од тешка форма на епилепсија, стана првиот пациент на кој му е вграден апарат во черепот за да ги потисне нападите.
Оран Ноулсон (13) има синдром Ленокс-Гасто, форма на епилепсија отпорна на стандардното лекување, а невростимулаторот кој хируршки му бил вграден му ги намалил дневните напади за 80 отсто, јавува Би-би-си.
Момчето развило епилепсија кога имало три години, а оттогаш му е дијагностициран аутизам и хиперкинетичко нарушување (АДХД).
Неговата мајка, Џастин, рекла дека нападите на Оран биле многу чести, како и дека тој често имал повеќе од стотина епизоди дневно, кои вклучувале паѓање на земја, губење на способноста за дишење и реанимација.
Оран е вклучен во проектот CADET, односно серија испитувања кои ја проценуваат безбедноста и ефективноста на длабоката стимулација на мозокот за тешка епилепсија.
Овој проект го развиле од болницата „Грејт Ормонд стрит“ (Great Ormond Street), Универзитетскиот колеџ во Лондон, болницата Кингс колеџ и Универзитетот во Оксфорд.
Нападите на епилепсијата се активираат од невообичаена електрична активност во мозокот, а целта на овој апарат е да ги запре или прекине абнормалните мозочни сигнали.
Операцијата, која траела околу осум часа, била извршена во октомври 2023 година.
Семејството на момчето наведува дека е свесни дека ова не е лек за епилепсија, но се надеваат дека ќе го подобри квалитетот на животот на Оран, пишува Би-би-си.