Рецепт за млади компири со сланина и јајца: Пикантно, вкусно и неодоливо!
![](https://www.slobodenpecat.mk/wp-content/uploads/2024/06/kompiri-so-slanina-i-jajca-Foto-Sergii-Koval-Alamy-Alamy-Profimedia.jpg)
Компирот е омилена намирница кај нас, па речиси секогаш го имаме дома. Постојат безброј варијанти на македонски јадења, но и на оние од светските кујни, во кои компирите се или главна намирница или прилог.
Денеска ви предлагаме еден интересен, а многу едноставен рецепт. Откако ќе подготвите компири на овој начин, веруваме дека често ќе се наоѓаат на вашата трпеза. Освен за вечера, можете да ги послужите и како главно јадење… Уживајте!
Состојки:
– маслиново масло
– 1,5 кг млад компир
– две-три чешниња лук
– две суви лути пиперки
– 100 грама сланина (со повеќе месо)
– четири јајца
– мајчина душичка, босилек
– сол, бибер
Подготовка:
Младите компири убаво измијте ги, па варете десетина минути во посолена, зовриена вода за малку да омекнат. Потоа, исцедете ги и префрлете ги во тава. Додадете ги целите чешниња лук, исечканите на ленти лути пиперки и ситно сечканата сланина.
Посолете, додадете бибер, зачинете со мајчина душица и босилек, прелијте со маслиново масло и печете во рерна на 200 степени 25 минути. Во меѓувреме, испржете ги јајцата на око, па послужете ги со компирите.