Рецепт на Стефанија Несторовска: Колач чоко-портокал, ќе ги задоволи непцата на сите сладокусци
Рецептот доаѓа директно од рацете на вештата и инвентивна Стефанија Несторовска, која стои зад инстаграм-профилот и блогот snestorovska.com.
Стефанија денеска ни приготви чоколаден колач со портокал, кој ќе ги задоволи непцата на сите сладокусци, а самиот изглед на колачот е вистински рај за очите.
Состојки:
За колачот:
– 150 г (1+1/2 шолја) овесно брашно
– 100 г (1 шолја) мелени бадеми
– 40 г (1/3 шолја) какао
– малку морско оревче + ѓумбир
– 2 лажички прашок за печиво
– 105 г (1/3 шолја) јаворов сируп
– 1 јајце
– кора од 2 портокали
– сок од 1 портокал
– 55 г (1/4 шолја) кокосово масло, стопено
– 180 мл (3/4 шолја) млеко од бадеми
За чоколадниот прелив:
– 170 г (1 шолја) чоколадни капки или 1 црно чоколадо
– 1 лажичка кокосово масло
За топингот:
– сечкан портокал
– бадем ливчиња или нешто по ваша желба
Подготовка:
Се загрева рерната на 160 степени и се пропрскува со кокосово масло калапот за колачот. Може да се користи каков било калап.
Во голем длабок сад се додаваат сите суви состојки. Убаво се промешува за да се соединат.
Во одделен сад се додаваат сите други состојки (без кората од портокал) и се промешува за да се соединат.
Оваа смеса се додава на сувата смеса и се промешува за да се соединат сите состојки.
На крајот, се додава и кората од портокал и нежно се промешува за да се соедини со смесата.
Се додава смесата во калапот за печење и се пече 40 минути.
За чоколадниот прелив се додаваат чоколадото и кокосовото масло во мало тенџерче и на многу ниска температура се остава да се растопи.
Се додава како прелив на колачот и одозгора се додаваат глазури по желба.
Се остава малку да се зацврсти пред да се исече.
Највкусно е секако кога е топло и тазе, а инаку може да се чува на собна температура два дена или во ладилник до пет дена.
Забелешки и совети:
→ Не заборавајте да ги мерите овесното брашно и бадемите откако ќе ги сомелете.
→ Јаворовиот сируп може да се замени со каков било друг течен засладувач по желба.
→ Млекото од бадеми може да се замени со какво било друго млеко од јаткасти плодови или, пак, со обично млеко.
→ Ако не сакате да изрендате два портокали, користете кора од само еден портокал, истиот од кој потоа ќе го искористите и сокот за овој рецепт. Но, јас мислам дека дава екстра вкусна нота на самиот колач па затоа го препорачувам.
