Раководството на Манчестер јунајтед си постави цел: Титула во 2028 година
Раководството на фудбалскиот клуб Манчестер јунајтед и новиот извршен директор Омар Берада си поставија цел, титула во Премиер лигата во 2028 година.
Според „Ди Атлетик“, ова се случи на средбата со стручниот штаб на клубот што се одржа на „Олд Трафорд“ минатата недела.
На средбата Берада го претстави т.н. „Проект 150“, со кој новото раководство планира да ја одбележи 150-тата година од постоењето на клубот, основан во 1878 година како Њутн Хит.
Воедно шефот најави дека желбата на сопствениците е во истата година женската екипа на Манчестер јунајтед да ја подигне првата шампионска титула во својата историја.
„Црвените ѓаволи“ последен пат ја освоија Премиер лигата во 2013 година, а стартот на оваа сезона повторно беше разочарувачки. Играчите на Ерик тен Хаг го заземаат 11. место на табелата, а исто така не успеаја да го забележат очекуваниот успешен старт во Лигата на Европа.