Претседателот на Бугарија, Румен Радев изјави дека неговата земја „не треба да се спушта на нивото на коментарите од Северна Македонија“. Тој го коментираше одвојувањето на Албанија од Македонија на европскиот пат како „логични последици од политиката на владата на Северна Македонија“.

„Во никој случај не треба да се спуштаме на нивото на коментарите од нашиот сосед. Ги повикувам сите бугарски политичари на воздржаност. На крајот на краиштата ние долго сме дел од Европската унија, и мора да покажеме поконтролирано однесување“, рече Радев.

Во врска со одлуката ЕУ да ги започне пристапните преговори со Албанија, но не и со Македонија, Радев рече:

„Ова се логични последици од политиката на Владата на Република Северна Македонија и патот кој го одбраа. Уште од доаѓањето на оваа власт предупредував дека ќе има проблеми околу познавање на меѓународното право и кон евроинтеграциите. Но, јас изјавив дека сме подготвени да помогнеме. Бугарија ќе продолжи да помага, но имаме свест што значи Европската унија и како да се работи за да се постигна националната цел што Северна Македонија ја постави. Владата досега работеше во спротивна насока. Вистинската насока е да се вклучат Бугарите во уставот, затоа што тоа е во преговарачката рамка на ЕУ и мора да се почитува“.