На македонскиот пазар не му се заканува млечна криза, а домашното млекопроизводство е стабилно и покрај фактот дека страшните горештини летоска ја намалија млечноста на кравите за 30 отсто. Дел од домашните фармери велат дека секое лето се повторува истата ситуација, бидејќи на кравите им е поудобно на пониски температури, но дека состојбата е стабилна.

Според Државниот завод за статистика од 2017 година до денес постојано опаѓа производството на кравјо млеко во земјава. Лани биле произведени 238.328 илјади литри кравјо млеко, што е за 26,5 отсто помалку во однос на 2022 година. Намалување на производството е забележано и кај овчото млеко, и тоа за 20,5 отсто во 2023 година во однос на претходната година. Производството, пак, на козјо млеко е зголемено за 3,3 отсто споредено со претходната година. Во земјава има 79.021 молзни крави и тие во просек даваат 3. 016 литри млеко годишно.

– Нашите грла многу тешко ги поднесуваат високите температури, жештините го земаат данокот кога е во прашање количеството на измолзено млеко по грло, па така млечноста се намалува и до 30 отсто. Покрај тоа и кравите како луѓето, летно време помалку јадат, но сега се враќа млечноста – вели за „Слободен печат“, млекопроизводителот и член на УО на Националната федерација на фармери, Стеванчо Јордановски.

Според Јордановски, со намалувањето на температурите, нема да има млечна криза, а и откупната цена по литар е добра и изнесува од 30 до 35 денари.

– Сепак, трошоците за одржувањето на фармите се високи и најдобро поминуваат оние што имаат сопствена храна, бидејќи нејзината цена во зима се зголемува – додава Јордановски.

Инаку, Македонија е нето-увозник на млеко и млечни производи, и тоа од Словенија, Германија, Хрватска, Србија, Црна Гора, БиХ, Република Чешка, Република Бугарија, Грција, Франција.

Млекарското производство се карактеризира главно преку ниската продуктивност, а основен проблем е обезбедувањето на евтина добиточна храна.

– Производството на млеко се карактеризира со голем број мали фарми – традиционални фармери (75 отсто од вкупниот број) што имаат нископродуктивни 1-3 крави со ниско годишно производство на млеко од 2-3 илјади литри по крава. Многу е мал бројот на големи специјализирани фарми со повеќе од 20 крави (околу 3 отсто од вкупниот број) со висока продуктивност и годишно производство на млеко околу 5 илјади литри по крава. Само 1 отсто од фармите имаат повеќе од 50 грла и треба да бидат носители на производството на квалитетен генетски материјал за преостанатите фарми (репродуктивни центри) – објаснуваат од Групацијата за млекопроизводство при СКСМ.