Во Македонија пристигнаа четирите локомотиви кои беа изнајмени од „Србија Карго“ за потребите на „Железници на Северна Македонија“.

Министерот за односи меѓу заедниците и водач на Демократската партија на Србите во Македонија, Иван Стоилковиќ објави дека локомотивите веднаш ќе бидат ставени на располагање и во функција на „Железници на Северна Македонија“.

– Да потсетам, станува збор за четири локомотиви за товарен сообраќај што ќе бидат од суштествено значење за непречено фунционирање на товарниот сообраќај низ Македонија, преку Србија, до земјите од Европската Унија. Договорената соработка е од големо значење не само за двете железнички компании туку и за севкупната регионална соработка по коридорот 10 која не само што ќе го зголеми капацитетот на транзитниот сообраќај, туку и приходите, во пресрет на сè поголемата побарувачка на товарниот транспорт – напиша Стоилковиќ.

Како што информираат од „Македонски железници“, овие локомотиви првенствено ќе бидат наменети за влеча на возови со стока и материјали по Коридорот 10 и ќе придонесат да се расчисти застојот на „Табановце“ и во Гевгелија.