Американските авиокомпании откажаа или одложија илјадници летови бидејќи ураганот Хелен, кој добива на сила, се очекува силно да ја погоди Флорида, пренесува N1. 

Вкупно 1.038 летови се откажани, а 1.672 се одложени, според веб-страницата за следење летови Flytaver.

Официјалните лица издадоа предупредувања за итни случаи и ги повикаа жителите во крајбрежните области долж патеката на ураганот да се евакуираат пред катастрофалните ветрови и потенцијално смртоносниот бран на бура.

Аеродромите низ погодените региони ги предупредија патниците преку X мрежата за потенцијални доцнења или откажувања на летови.

Официјалните прогнози и предупредувања велат дека невремето ќе биде катастрофално и опасно по живот.

Гувернерите на американските сојузни држави Флорида, Џорџија, Северна Каролина, Јужна Каролина и Вирџинија прогласија вонредна состојба пред бурата да стигне на копно. Мексиканскиот полуостров Јукатан и туристичките места Канкун и Козумел беа поштедени од големи штети бидејќи ураганот во голема мера го заобиколи североисточниот брег на Мексико, пишува Би-би-си.

Силните дождови предизвикаа поплави во делови од мексиканската држава Кинтана Ру. Снимката споделена од туристи и локалното население во Канкун покажува автобуси кои се обидуваат да се движат по поплавените улици во област каде што се наоѓаат многу хотели во градот. Гувернерот на овој мексикански регион изјави дека нема жртви, а властите известија дека се обновува напојувањето во областите каде што е прекинато.