Јанакопулос кој неколку години е во „вербална“ војна со првиот човек на Евролигата, Жорди Бертомеу, најави дека е голема веројатноста „зелените“ од Атина да го напуштат ова натпреварување и да се преселат во Лигата на шампионите во организација на ФИБА.

– Евролигата е црна кутија. Екипите не знаат каде одат приходите, Евролигата го допре дното и тоа благодарение на Жорди Бертомеу. На последната прес конференција претставниците на Реал Мадрид изјавија дека Евролигата не може да постои без Панатинаикос. Им благодарам за тие зборови и нека му ги пренесат истите и на Бертомеу – вели Јанакопулос кој се надева дека Лигата на шампионите ќе ја згасне Евролигата.

– Евролигата конечно доби вистински противник, Лигата на шампионите е организација во подем и е подготвена да ја згасне Евролигата. Пред две години не беа подготвени, но сега состојбата е поинаква – тие се подготвени – додава контроверзниот сопственик на Панатинаикос.

Јанакопулос ја шокира јавноста со откритието дека го ставил осумкратниот европски шампион на продажба и тоа за 25 милиони евра.
– Панатинаикос е на продажба за 25 милиони евра. Го напуштам ПАО како шампион и со крената глава. Го завршив своето во Панатинаикос, одлуката е дефинитивна и конечна. Што се однесува до излегувањето од Евролигата, тоа уште не е решено.