Во Културниот центар „Лабораториум“ во Скопје на 25 септември, од 20 часот, ќе се одржи поетскиот перформанс „Граматика на љубовта“. Во изведбата на перформансот учествуваат Тихомир Јанчовски (глас), Иво Солдатовиќ (кларинет) и Андреа Мирческа (глас и контрабас).

По завршувањето на официјалниот дел ќе следи полуофицијален, со музицирање на авторот и неговите пријатели Добрила Грашеска, Бранислав Николов, Перо Сарџоски…

По завршувањето на официјалниот и полуофицијалниот дел, ќе следи редовната програма „Лабораториум: Експериментален џем“.

Книгата „Граматика на љубовта“ не може да се најде на интернет или во книжарница, постои само како влезница за поетскиот концерт.

Тихомир Јанчовски е современ македонски поет, писател и преведувач. Роден е во 1967 во Скопје. Дипломирал општа и компаративна книжевност на Универзитетот „Св. Кирил и Методиј“ во Скопје во 1991 година. Специјализирал во Будимпешта, на катедрата за Средновековни студии на Централно Европскиот Универзитет. Се занимава со поезија, превод, медиевистика.

Живеел на многу места во Македонија и светот: Скопје, Охрид, Брисел, Сежана, Постојна, Будимпешта, Лондон, Амстердам, Робово, Брајчино, Скијатос, Сараево. Работел многу професии, најмногу како професор по литература и светска историја. Досега објавил над триесет книги, главно поезија, преводи, романи и една книга историја. Живее и работи во Скопје и на Скопска Црна Гора.