Центарот за управување со кризи информира дека денеска околу 12:30 часот на бројот за итни повици 112 вознемирен планинар пријавил дека едно лице од седумчлената планинарска група паднало во провалија длабока педесетина метри.

Во пријавата било потенцирано дека лицето при падот се здобило со сериозни повреди на главата, имало крварење и било во состојба на бесознание.

Несреќата се случила на територијата на Општина Маврово-Ростуше, пред изворот на Тресонечка Река во близина на месноста „Раскрсницата“.

Поради непристапноста на теренот за возила Итната медицинска помош не била во можност да се упати кон местото на несреќата.

По барање на ЦУК во извлекување на лицето се интервенирало со хеликоптер на МВР и тим на специјалната антитерористичка единица „Тигар“.

Лицето со хеликоптерот било транспортирано до ГОБ „8ми Септември“ во Скопје, каде од страна на докторите е констатирана смрт, информираат од ЦУК.