Актерот Џон Дејвид Ештон почина на 77-годишна возраст, по битката со ракот. Тажната вест за неговата смрт ја потврдил и неговиот портпарол Алан Сомерс, пренесува „ТМЗ“.

– Џон зад себе остава богато наследство на љубов, посветеност и услуга. Неговиот спомен засекогаш ќе го негуваат неговата сопруга, децата, внуците, како и неговиот брат, сестрите, поширокото семејство и сите што го сакаа. Влијанието на Џон врз светот ќе го паметат и слават генерациите што доаѓаат – изјавил неговиот портпарол.

Џон се појави во повеќе од 200 филмски, телевизиски и театарски продукции, а стана познат во 1984 година благодарение на филмот „Полицаец од Беверли Хилс“ во кој го играше Џон Тагарт, тврдоглавиот полицаец.

Последен пат јавноста можеше да го види во јуни оваа година во Лос Анџелес, кога заедно со Еди Марфи и остатокот од екипата учествуваше на премиерата на четвртиот дел од филмот што го прослави.

Тој зад себе ги остави сопругата Робин Хоје и децата, ќерката Мишел и синот Мајкл Томас и внуците.