Во Иран ќе се одржи втор круг од претседателските избори меѓу реформскиот кандидат Масуд Пезешкијан и ултраконзервативниот Саид Џалили, потврди денеска изборниот претставник врз основа на прелиминарните резултати.

Претседателските избори во петокот беа набрзина распишани по смртта на конзервативниот претседател Ебрахим Раиси (63), кој загина во хеликоптерска несреќа на 19 мај.

Портпаролот на изборното тело Мохсен Еслами денеска ги соопшти прелиминарните резултати на прес-конференција што ја пренесуваше иранската државна телевизија. Според нив, ниту еден од кандидатите не добил повеќе од 50 отсто од гласовите потребни за победа во првиот круг, па вториот круг ќе се одржи меѓу двајцата водечки кандидати.

Еслами рече дека од 24,5 милиони преброени гласови, пратеникот Пезешкијан освоил 10,4 милиони гласови (42 отсто), а поранешниот преговарач за нуклеарни прашања Џалили освоил 9,4 милиони (38 отсто). Претседателот на парламентот Мохамад Багер Калибав доби 3,3 милиони, додека шиитскиот свештеник Мостафа Пурмохамади доби повеќе од 206.000 гласови.

„Ниту еден од кандидатите не освои апсолутно мнозинство гласови и затоа првиот и вториот кандидат ќе одат во вториот круг на 5 јули“, изјави Еслами.

Според правилата, доколку ниту еден од кандидатите не добие повеќе од 50 отсто од гласовите, водечките двајца кандидати се квалификуваат во вториот круг.

Од 14 претседателски избори организирани од 1979 година, само за еден беше одлучено во вториот круг, во 2005 година.

На изборите, на кои право на глас имаа 61 милион гласачи, учествуваа четворица кандидати, тројца конзервативци и еден реформатор.