Пејачот на познатиот хит пронајден мртов во својот дом, имаше 49 години
Пејачот на бендот „Крејзи таун“ (Crazy Town) Сет Бинзер, познат под прекарот Шифти Шелшок, почина на 49-годишна возраст, јавуваат светските медиуми.
Пејачот го пронашле мртов во неговиот дом во Лос Анџелес. Причината за смртта сè уште не е позната.
Шифти Шелшок се прослави во раните 2000-ти со „Крејзи таун“, чиј најголем хит беше „Butterfly“, кој беше број еден на музичките топ листи во светот, вклучувајќи го и Билборд хот 100.
Бендот издаде следен албум во 2002 година, но набрзо се распадна по лошиот комерцијален настап. „Крејзи таун“ повторно се формираше во 2007 година и го издаде својот трет албум, „The Brimstone Sluggers“, во 2015 година.
Надвор од „Крејзи таун“, Шифти Шелшок имаше хит со британскиот продуцент Пол Оукенфолд, вклучувајќи го и „Starry Eyed Surprise“.
Бинзер со години се бореше со зависноста од дрога и алкохол, па дури беше и во кома.
Пејачот долго време се бореше со злоупотреба на дрога и се појавуваше во различни реални шоуа за да си помогне да се избори со зависноста, вклучувајќи ги првиот и вториот дел на „Celebrity Rehab“ и првиот и вториот дел на „Sober House“.