Амбасадата на Јапонија ја организираше патувачката изложба „Јапонскиот лебдечки свет“ на големите јапонски мајстори за дрворези од 17. и 18. век во повеќе градови низ државата, а последната поставка е изложена во Скопје.

По повод 30 години од воспоставувањето на дипломатските односи помеѓу Јапонија и Северна Македонија, 30 Укијо-е реплики патуваа од Велес кон Прилеп, Ресен, Охрид, Македонски Брод, Свети Николе, Неготино, Гевгелија и Богданци.

Во секој град ученици имаа можност да дознаат повеќе за уметноста и животот за време на периодот Едо, кога се создавале дрворезите кои биле инспирирани од женската убавина, кабуки-театарот, сумо-борачите, флората и фауната итн. Дрворезите имале огромно влијание и врз француските импресионисти, како и европските постимпресионисти.

Последната изложба ја отворија амбасадорот Оцука Казуја, Антонио Димитров, директор на Културно-информативниот центар – Скопје (КИЦ), Маја Стефкова од „АОТС Македонија“, како и кураторот на изложбата Јасмина Намичева.

Цртежите на децата кои учествуваа во работилниците, исто така, се изложени и секое дете доби сертификат за учество, додека амбасадорот Оцука и „АОТС Македонија“ добија Укијо-е реплика од Тошусаи Шараку.

Укијо-е принтовите се донација од Друштвото на македонско-јапонско пријателство и соработка и патуваа благодарение на г. Горан Антевски, „АОТС Македонија“ и „Раде Кончар“ ТЕП на иницијатива на Јасмина Намичева („МузеумЛинк“ и „Архифакт“) и Амбасадата на Јапонија.

Финалното изложување е овозможено од Антонио Димитров и тимот на КИЦ-Скопје, поддржано и од „Пивара Скопје“ и „Тиквеш“. Изложбата во КИЦ-Скопје ќе биде достапна до 5 јули.