Организаторите на фестивалот во Венеција морале да спречат средба на Анџелина Џоли и Бред Пит
Холивудските ѕвезди, Бред Пит и Анџелина Џоли се обидуваат да избегнат средба додека ги промовираат своите филмови на овогодинешниот филмски фестивал во Венеција. Имено, организаторите се погрижиле поранешните сопружници да не се сретнат, за да се избегнат непријатни ситуации, пренесува „Пејџ сикс“.
„Анџелина ќе биде присутна првиот ден, четврток, 29 август, а потоа ќе отпатува на филмскиот фестивал „Телуриде“ во Колорадо со режисерот Пабло Ларен. Бред доаѓа во Венеција во сабота. Нема шанси да се вкрстат нивните патишта“, изјавил уметничкиот директор на фестивалот, Алберто Барбера.
Џоли завчера пристигна во Италија за да го претстави својот филм „Мари“, кој зборува за животот на оперската пејачка Марија Калас. Пит ќе го претстави филмот „Волци“ во Венеција, во кој глуми со Џорџ Клуни.