Граѓаните што имаат право на туѓа нега поради медицински состојби, сѐ уште се без пари поради застојот во работата на комисиите што одлучуваат по нивните барања. Скопјанката Силвана Костиќ, која е пациентка на дијализа 21 година, вели дека уште не може да добие конзилијарно мислење затоа што не е во можност да закаже термин. Таа без парите наменети за туѓа нега е повеќе од шест месеци, иако состојбата со пандемијата полека се по стабилизира.

– Народниот правобранител веќе е инволвиран во случајот затоа што моите права се загрозени. Мене никогаш нема да ми проработат бубрезите и нема да ми се подобри состојбата, а сепак ме тераат да доставувам документи за да добијам ново конзилијарно мислење и да можам да ја добијам туѓата нега. Меѓутоа, термин за овие конзилијарни мислења не може да фати ни мојот матичен лекар, ни внука ми која е лекарка. И двете чекаат некако да се ослободи термин, но тоа не се случува со месеци. Веќе сум без тие пари шест месеци. Во меѓувреме, ја оперирав и раката и сега, згора на сѐ, функционирам со една рака – изјави Костиќ за „Слободен печат“.

Министерството за труд и социјална политика знае за проблемот со недостигот на термини во комисиите. Тие неодамна го зголемија бројот на термини од 200 на 280 месечно по комисија, меѓутоа, и тоа не е доволно да се опфатат сите граѓани на кои што им е потребен додатокот.

„Во постојана координација сме со Министерството за здравство за надминување на проблемот, со олеснување на пристапот за граѓаните за остварување на правото на надоместок за помош и нега од друго лице. Месечниот број термини до надминување на пандемијата се зголеми од 200 на 280 по комисија. Корисниците на правото на надоместок за помош и нега од друго лице кои го користат правото со контролен преглед, по добивање нов наод, оцена и мислење на потребата од помош и нега, продолжуваат да го користат правото, доколку наодот е позитивен и за нив следи ретроактивна исплата од денот на контролниот преглед“, ни рекоа од Министерството за труд и социјала неодамна.

Пациентите што имаат проблеми како, на пример, трајно оштетување на бубрежната функција или слепило во висок процент што нема никогаш да се промени, не се задоволни што им е наложено на одреден временски период да доставуваат документи за да добијат додаток или помош од државата. Тие велат дека непотребно им се бараат едни исти документи, непотребно се малтретираат и чекаат во редици, за на крајот да се покаже дека ништо со нивната медицинска состојба не е поинакво од претходниот состанок одржан за да добијат конзилијарно мислење. Тие бараат да добиваат трајни решенија за туѓа нега.

Во стручните комисии формирани во јавните здравствени установи има тројца лекари-специјалисти или субспецијалисти од областите на интерна медицина, неврологија, психијатрија, физикална медицина и рехабилитација, ортопедија или офтамологија. Термините се закажуваат преку матичните лекари, а ги обезбедуваат исклучиво лекарски комисии од јавните здравствени установи. Во земјава има само 15 комисии, и тоа пет во Скопје и десет во другите клинички и општи болници во земјата.

Силвана Костиќ од Скопје крајно разочарана од институциите: Во пандемија ми ја укинаа туѓата нега, нови бубрези нема да ми пораснат!