Поради временската прогноза која за денеска најавува невреме со врнежи од дожд и засилен ветар, екипите на ЈП „Водовод и канализација“ во текот на изминатите денови, но и утрово се на терен и ги расчистуваат сливниците и шахтите, со посебен акцент, како што велат оттаму, на критичните точки на територија на град Скопје.

Тимовите распределени по реони работат на рачно и машинско чистење на сливниците и шахтите кои се дел од атмосферската канализациона линија, со цел овозможување на нејзина непречена функционалност.

Апелираме до граѓаните, совесно и одговорно да се однесуваат кон канализационата линија, атмосферска и фекална, бидејќи истата не е депонија за одлагање на секаков тип на отпад, кој проднесува до затнување на линиите и при поголемо количество на вода дури и поплави. Во текот на изминатите денови, при чистење на атмосферската линија отстранети се над 15 м3 отпад, што претставува дел од причините за намалување на протокот на вода во системот – велат од „Водовод и канализација“.

Оттаму додаваат дека продолжуваат да работат во интерес на граѓаните на Скопје и организирани во дежурни тимови ќе останат на терен сѐ додека не помине овој циклус на променлива временска прогноза проследена со силно невреме.